شباب مصر (الأحرار) يتحدثون عن أنفسهم

شباب مصر (الأحرار) يتحدثون عن أنفسهم

..

نعم يتحدثون عن أنفسهم، بوضوحٍ شديد.. فلا أستطيع أن أصمت وأنا أرى كل هذا التكاتف والترابط والتعاون بين شعب مصر

ففي الوقت الذي كانوا في أمس الحاجة للحماية، كانوا هم من يحمون أنفسهم وبلدهم.. في الوقت الذي اختفت فيه عناصر الشرطة (تماماً) –معرفش فين- كان شباب مصر هم أمنها وحمايتها

همّا ال نظموا المرور وكانوا بيفتشوا سيارة سيارة للتأكد من هوية من بها، همّا ال حموا نفسهم وجيرانهم، همّا ال حموا ممتلكاتهم، حموا ممتلكات البلد.. عارفين يعني إيه ممتلكات البلد؟! يعني متاحف ومساجد وكنائس وأقسام شرطة .. أيوه بالظبط همّا ال حموها، عملوا سلاسل بشرية لحمايتها من السرقة والتخريب.. لما طلع الأمناء وبلطجية يكسروها ويسرقوها.. إنتو متخيلين الموقف، العملية أصبحت بالعكس..

همّا ال كانـوا بيقبضوا على الحرامية ويسلموهم للجيش، حولوا أماكن لعيادات لعلاج المصابين، الأطباء تطوعوا بالعلاج والسهر في ميدان التحرير.. سواء مؤيدين أو محايدين، لأن لم هناك أطباء معارضين

شبـاب مصر –أنا أحياناً كنت بقول عن معظمهم سلبي- أثبت لي وأثبت للعالم إنه لا يعرف ما معنى السلبية، أثبت إنه لمّا يتحط في موقف حرِج وموقف بيهدد أمان أهله وبلاده، هيعرف يتصرف ويقف في وجه أي معتدي. الشباب ده نظّم نفسه من غير عمليات ولا نقاشات ولا جلسات.. عملوا ورديات لنفسهم بكل تلقائية

ونجحوا نجاحاً باهراً..

وتخيلوا إيه كمان؟ كانوا بينضفوا الشارع!!! أيوه ده صحيح هتقولوا إن أصلاً شوارع مصر مش نظيفة

..بس دلوقتي همّا بينضفوهـا من (كل) حاجــة

..تكاتفت الأيادي بكل الديانات بكل الطوائف بكل التوجهات السياسية واجتمعت على هدف واحد هو حمـاية مِصـر

..آه نسيت أنوّه.. الشباب ده هوّ ال قاد ثورتنا وهوّ ال بيطالب بحقوقه المشروعة، وهيفضل يطالب بيها لحد ما ياخدها

الشباب ده، ال كان كتير مستهين به، أثبت قد إيه هو شباب واعي وفاهم

..أنا بجد فخورة بهم وواثقة إن طالما عندنا شباب كده .. بلدنـا هتفضل بخيـر

صح الثورة دي أدت إلى قتلى وجرحى وخراب لبعض المباني.. بس لكل حاجة في الحياة ثمن .. وهوّ ده ثمن حريتنا وثمن حقوقنا المسلوبة.. وده ال هيخلّينا نغيّر مصر للأفضل

وجزء بسيط –على المستوى الاجتماعي- من إيجابيات الثورة دي إنها عرّفت الناس قد إيه همّا إيجابيين وقد إيه همّا بيحبوا بعضهم وبيحبوا بلدهم –بيحبوها بجد-..

..عرّفتهم إنهم متعاونين .. عرّفتهم إنهم ممكن يضحوا بدمهم عشانها فعلاً، مش بس كلام

أنا كل ده شفته بس من صور وفيديوهات وحكاوي .. الناس ال عاشت الوضـع بقى تقـول إيه؟!!

كان نفســي بجد أنزل وأكون جزء من هذه الثـورة

هؤلاء الشباب اجتمعوا على .. حُـب مِصـــر

..شبـاب مصر، أنتم الأمل .. أنتم الثورة .. أنتم النصر

وعاشت مِصـر حـرة

———————-

،تنويه: أنا لم أتحدث عن الثورة أو عن ميدان التحرير بشكل خاص

حتى لا أبخسها حقها الآن

نظرتي هُنا للشعب بشكلِ عام، جزء من هنا وجزء من هُناك

آلاء المُشنِـب

30-1-2011