خالد خالد يا بطل .. دمّك آه حرر وطـن..

#KhaledSaid #Egypt #June6 #Jan25

خالد خالد يا بطل .. دمّك آه حرر وطـن..

بكرة .. الذكرى الأولى لاستشهاد خالد سعيد..

مين خالد سعيد؟!! خالد سعيد، شاب مصري اتقتل على إيد اتنين مخبرين، يقال السبب في ذلك هوّ فيديو بيفضح ضباط ومخبرين في قسم شرطة سيدي جابر في الإسكندرية..

عن نفسي؟ ميهمنيش أبداً السبب .. اياً كان السبب إيه هوّ .. مفيش أي حاجة تعطي الحق لأي شخص إنه يفضل يضرب فواحد ويضرب راسه في درابزيين سلم .. ويشوطه برجله .. والضحية تترجى إل بيضرب ويقوله هاموت .. يقوله إحنا عايزينك تموت .. إنت هتموت النهاردة.. بعدين ياخدوه معاهم في إسعاف/ بوكس/ تاكسي .. ويجيبوه تاني ويرموه في الشارع..

هل في أي حاجة في الدنيا تشفع لأي حد إنه يعمل كدة؟!!!!

بس إجرامهم مخلصش هنا، بعد ما الموضوع اتحول قضية رأي عام .. طلعت حملات حقيرة لتشويه سمعة خالد سعيد وأهله بإنه مدمن مخدرات وإنه هارب من الجيش الخ الخ الخ.. وإن أخوه يهودي وإنه خاين وبلا بلا بلا..

المخبرين طبعاً قالوا إيه في التحقيق؟!! إحنا ضربناه لحد ما موتناه؟؟

لأ طبعاً، قالوا ده كان معاه "لفافة" بانجو وإحنا كنا رايحيين نقبض عليه متلبس فا راح هوّ جري وبلعها .. فا اتخنق ومات .. وإحنا -ياا عيني- حاولنا نطلعهاله..

وتقرير الطب الشرعي قال إيه؟؟؟ قال إن (المجني عليه) مات بإسفكسيا الخنق بسبب اللفافة دي .. اللفافة دي إل مطلعتش في ولا جلسة من جلسات محاكمة القتلة .. غير في آخر جلسة وكانت أبعادها مختلفة عن إل في التقرير أصلاً..

طبعاً .. الأغلب عارف الكلام ده كلّه ..

أنا بس حكيت إل .. حتى لا ننسى .. الألم إل عاشوا خالد سعيد قبل ما يُقتل .. الألم إل عاشوه أهله بقتله مرة .. وبتشويه سمعته مرة تانية .. (ويا رب منقولش بعدم أخد حقه مرّة تالتة)..

خالد سعيد .. كان من أهم أسباب الثورة، الناس كانت عارفة إن في تعذيب وقتل وقمع وإن في ناس بتموت في الأقسام وأمن الدولة والخ .. بس قضبة خالد سعيد هيّ إل اتنشرت وبقت قضية رأي عام ..

خالد سعيد هوّ رمز لكل من عُذب وقُتل في أقسام الشرطة أو أمن الدولة على أيدي جمادات  .. مع احترامي للأشياء، لأن الجماد له اتضغط عليه .. بيتكسر على الأقل..

خالد سعيد كان السبب إل خلاني أهتم بالأوضاع السياسية في مصر .. هوّ إل خلاني أحس بمصريتي، وطنيتي .. هوّ إل خلاني أعرف إيه هيّ حقوق الإنسان .. هوّ إل خلاني أكون إنسانة واعية وفاهمة إيه إل بيحصل .. خالد سعيد خلّاني أتغلب على أي خوف جوّايا .. خلاني أقول رأيي مهما كانت العواقب .. خلاني أتحدى أهلي عشان أشارك في حاجة على الأرض..

خالد سعيد علّمنا منسكتش على حقنا .. خالد سعيد قدملي وقدملنا كلنا حاجات كتير جــداً ..

ثورة 25 يناير بالنسبة لي .. مرتبطة ارتباط كبير ب خالـد..

خالد قدملنا حاجات كتير وعلمنا كتير من غير ما يعرفنا .. إحنا قدمناله إيه؟؟

محاكمة قاتليه مستمرة .. بقالها سنـة .. ومفيش أي جديد..

مع العلم إن المخبريين بس إل بيتحاكموا .. يعني مأمور القسم فين؟ إل لفّق تقرير الطب الشرعي؟ وأي حد ليه يد فينه؟؟

-----

لمّا كانت بتطلع مظاهرات عشان خالد سعيد .. كنت فعلاً باحس بالأمل، وإن الناس دي مش هتفضل طول عمرها تطلع بأعداد صغيرة ..

كنت باتابع المظاهرات أول بأول .. خصوصاً مظاهرات الإسكندرية ولمّا كان الأمن المركزي بيعمل عليهم كردونات ويمنعوا عنهم الميّه والأكل .. وحتى الهواء (لأن العدد كبير وخنقة) ... بس المتظاهرينيفضلوا صامدين صمود الجبال ..

وعمري ما هنسى المحاكمة الشعبية إل اتعملت لحبيب العادلي ومبارك ومحمد عثمان والمخبرين تحت بيت خالد سعيد ..

يمكن دي حاجة عادية بالنسبة لناس كتير .. بس بالنسبة لي، كانت أول مرّة أشوف كدة وأوال مرة أتابع بشغف كدة ..

تفتكروا ده كلّه مكنش سبب في قيام الثورة؟ تفتكروا خالد سعيد ملوش فضل علينا؟!!

وعمي ما هانسى برده أول وقفة صامتة نزلتها .. ده كان نفس  اليوم إل وصلت فيه مصـر .. وكان يوم ميلادي .. وأصريّت أنزل، ..

الإحساس إل انتابني لمّا نزلت فعلاً لا يُعوّض .. حسّيت إني باعمل حاجة ولو إنها بسيطة . دي مجرد وقفة صامتة مش مظاهرة ولا حاجة .. بس برده، حسيت إن في أمل ..

أيام ما نزلت الوقفات الصامتة فعلاً فعلاً اتمنيّت يكون في أمن مركزي في المكان إل أنا فيه .. بس لسوء حظي في المرات الثلاثة مكنش فيه :S

ثواني..

بعد كل ده طبعاً المفروض الواحد يقول الحمدلله إن الثورة قامت ومبقاش في تعذيب تاني ولا أي إهانة حتــى..

لا الحقيقة .. ده مش صحيح، من يومين سائق مكروباص اتقتل في قسم الأزبكية عشان "بيقولوا" إنه تطاول على مأمور القسم ..

وقبلها واحد كمان مات من التعذيب في قسم بولاق الدكرور ..

بس عارفين إيه الفرق المرة دي؟ الفرق إن الناس مسكتتش .. اتظاهرت قدام القسم، وصعّدت الموضوع للإعلام ..

وإحنا لازم نعرّف الكل إننا مش هنسكت على حقنا ولا دمنا بعد كدة ..

عشان كدة أنا بادعوكم للتظاهر بكرة قدام وزارة الداخلية .. عشان نطالب بتطهيرها من "الجمادات" إل فيها..

وعشان نوصل لهم رسالة إن دم المصريين "حيـطــة" حمراء .. وإننا أبداً مش هنسكت لو اتهاونوا مع قتلة المتظاهرين أو قتلة خالد سعيد او أي قضية تعذيب مستقبلية حصلت .. مش هنسكت

خالــد خالـد يا سعيـد .. دمك مش هيروح يا شهيــد  .. 

https://www.facebook.com/event.php?eid=149835878422175

دمتـم أحراراً..