3-8-2011 .. يـوم تاريخــي .. بس؟

النهاردة يوم .. تاريخي .. بكل ما تحمله الكلمة من معنى .. يوم لا المصريين ولا العرب والعالم هينساه ..

لأن في اليوم ده اتحاكم طاغية عربي .. طاغية قتل في شعبه وسرطنهم ودمر بلده على مدى 30 سنة .. كوّن عصابة كاملة تنهب البلد لحسابهم في ال 30 سنة دول..

أنا بصراحة الليلة إل قبل المحاكمة مكنتش متأملة قوي إن مبارك هيظهر .. وقعدت أقول هيقولوا لنا ده تعب ده مات ده مش عارف إيه..

طبعاً لما شفته في القفص هوّ وولاده والسفاح العادلي وبقية عصابة الداخلية .. انتابني شعور مش هاعرف أوصفه .. شعور بالفرح ... بالراحة .. إل عمله فينا مبارك مش قليل .. ومحستش ولو لحظة بشعور شفقة .. لان هو أصلاً مدناش فرصة نشفق عليه ..

طيب .. هوّ إحنا هنستفيد إيه يعني لمّا نشوفه في القفص؟ الشهداء هيرجعوا مثلاً؟ ولا المصابين هيشفوا؟ ولا البلد هيتصلح حالها؟

لأ ده كله مش هيحصل .. بس هيحصل الأحسن ..

لمّا نشوف مبارك بيتحاكم ومحاكمته علنية ونشوفه في القفص كدة..

هل ممكن أي رئيس أو مسؤول هيجي بعده .. يقدر يعمل فينا زي ما هوّ عمل؟!! هل هيجرأ إنه يسرق؟ يقتل؟ يسرطن؟ يبيع البلد؟ .. لا مش هيقدر .. مبارك هيبقى عبرة لكل من تسول له نفسه إنه يدوس على كرامة أي بني آدم مصري أو يسرقه أو يقتله .. أو يحاول حتى يستغفله .. ده سبب

السبب التاني بقى .. تتخيل لما أم أو أبو الشهيد يشوفوا إل قتل ابنهم (الراس الكبيرة إل أمرت بفتح النار) في القفص وبيتحاكم بعدالة يكون شعورهم إيه؟؟ دي متسواش كتير عندهم؟؟ دول قدموا للبلد ولادهم .. نستكتر إحنا عليهم العدالة؟!!

وبليز متقوليش جزاؤه عند ربنا .. جزاؤه فعلاً عند ربنا كبير .. بس ده مش معناه إننا نسيبهم بقى ولا لو هنسيبهم يبقى نسيب كل قاتل وكل حرامي عاديين وربنا يحاسبهم بقى . صح ولا لأ؟؟ المباديء لا تجزأ..

السبب التالت بقى إن العدالة بتتطلب إن لما الواحد يغلط (يقتل/يسرق/يعذب...) يتعاقب .. ومبارك مس فوق القانون ومش فوق العدالة .. عادي زي أي واحد وهيتحاكم .. مش  big deal يعني

وبعدين إنتوا مصدقين إن الراجل ده نفسيته تعبانة وإنه فعلاً لازم يتنقل على سرير .. ده بيستهبل وبيحاول يخلينا نتعاطف معاه .. بس بغباؤه برده فشل ..

طبعاً في ناس قعدوا يقولوا دي تمثيلية .. ودول بيستهبلونا وبيلهونا .. أولاً أنا مش شايفة إن دي تمثيلية، هو اتحاكم وبيتحاكم فعلاً قدامنا هوّ وولاده والعادلي ورجالته .. أما الحكم ده بقى .. فا دي حاجة لسه مش هنتكلم فيها قبل أوانها .. المهم المحاكمة دلوقتي ..

وبعدين فكروا معايا كدة، هيّ لو دي فعلاً تمثيلية المجلس بيعملها علينا .. مش ده معناه إن المجلس بيعملنا ألف حساب؟ وفعلاً مش عايز صدام مع الشعب؟ دي في حد ذاتها كفاية ..

بعدين ليه الناس مستقلية بنفسها وبإنجازاتها كدة؟؟ كل شهيد وكل مصاب وكل إل شارك في الثورة دي .. كل إل اعتصم من 8 يوليو (رغم كل الظروف من حر ورفض الشارع وو) لحد ما اتفض الاعتصام بالقوة يوم .........، وكل حر دافع عن الحق هوّ السبب في إن النهاردة يكون يوم تاريخي .. هو إل عمل كدة .. متستقلوش أبداً بنفسكوا ..

أما بقى إل بيقول نبطل اعتصامات ومظاهرات .. فا بأقول له أظن واضح  الاعتصامات بتوصلنا لإيه؟!! لحاجة إنت مكنتش تحلم بيها لأنك أصلاً مش عايز تحلم بيها .. بس لما جات .. بقت وااو والحمدلله إحنا أنجزنا .. صح؟؟ محدش بقى تاني يقول بطلوا تعتصموا..

بعد بقى ما المحاكم خلصت وفرحنا وكدة .. جاتلي مسج مستفزة جداً بتقول:

"يحاكم (حسني مبارك) أمام العالم بأسره وهو على الفراش .. في شهر الرحمة والغفران، شهر رمضان، .. أليس في قلوبنا رحمة؟! إصحي يا أمة ضحكت من جهلها الأمم..."

أنا طبعاً قرأت الرسالة واتجننت .. جهل مين يا أبو جهل؟!! ده الناس بتضرب المثل في عدالتنا .. وإيه يعني يتحاكم في رمضان ولا غير رمضان؟!!! ومدايقكوا قوي إنه على السرير .. طيب مشفتوش إنه نايم عادي جداً ولا كأن في حاجة أصلاً؟! ده جِبِلة يا إخواننا ومعندوش دم والله..

بعدين لو سبتني من كل ده .. هوّ عمره سأل على حد فينا؟!! عمره سأل شعبي شبعان ولا جعان؟ عمره سأل لاقيين مكان يعيشوا فيه ولا لأ؟

سأل على ضحايا العبارة إل غرقت؟! طب سأل على أهلهم المكلومين؟ ولا راح يحضر تدريب ماتش .. ولما جاب سيرتهم قال عبّارة من إل بيغرقوا دول؟!!!

 طب عمره سأل على المعتقلين في السجون؟ عمره سأل دول مظلومين ولا لأ؟!!!  عمره سأل عددهم قد إيه أصلاً؟ عمره سأل بيتعاملوا إزاي؟

آه هوّ ممكن كان بيسأل .. بس عشان يتأكد إذا كانوا بيتهانوا كويس ولا لأ .. وعشان يتأكد الشعب مقموع كويس ولا لأ ..

مبارك كان بيعتبرنا عبيده مش شعبه إل لازم يحترمه .. إزاي متوقعين مننا نحترمه ونقدره بقى وكدة؟!! نحترم قاتل شعب؟!!!

آه هو مش لوحده، وكل إل كانوا معاه بيتحاكموا كمان متقلقوش .. مش هنسيب حد ..

وعلى فكرة مبارك فعلاً بيتعامل أحسن معاملة، في مستشفى عالمي، والمفروض يكون في مستشفى السجن أصلاً .. ومتدلع آخر دلع .. فا اسكتوا بقى .. في الثورات التانية: أذناب الأنظمة الفاسدة كاننوا كلهم بيعدموهم الثوار .. بس إحنا غيــر :)

أما المحاكمة نفسها بقى .. فا طبعاً كان ناقصها شفيق وعمر سليمان ووو

المهم .. متيأسوش من عدالة ربنا .. ومتقللوش من شأنكم ومن قوتكم .. إنتوا عملتوا حاجاااات تاريخية يشهد لها العالم ولسه هتعملوا ..

دمتم أحراراً..