قضاء مُستقِــل = عدالـة دائِمــة ..

أي دولة عندها سلطة قضائية وسلطة تشريعية وسلطة تنفيذية .. أنا هاتكلم عن التنفيذية والقضائية ..

إيه هيّ السلطة القضائية؟ دي بتتكون من القضاء والمحاكم في الدولة .. السلطة القضائية هي المسؤولة إنها تحقق العدالة وتجيب حقوق الناس.. وتحافظ على حقوق الناس..

إيه هيّ السلطة التنفيذية؟ السلطة التنفيذية هي عبارة عن الحكومة: الوزراء ونواب الوزراء و كمان رئيس الجمهورية، بالإضافة إلى الشرطة والقوات المسلحة..

بدايةً كدة .. أنا مش بتاعت قانون ومبفهمش أوي فيه .. بس هاكتب إل أنا فاهماه .. وشايفاه ..

دلوقتي بعد ما عرفنا إيه هي السلطة القضائية وإيه هي السلطة التنفيذية.. تفتكر لو السلطة التنفيذية (إل همّا ضباط شرطة وجيش ووزراء وطبعاً رئيس) .. اتداخلت مع السلطة القضائية وخلت (القضاء والمحاكم جزء منهم) .. هل ممكن يتحقق عدل؟! هل ممكن أي حد في البلد يتحاسب..  لأ، ليه؟

لو  وزير سرق، القضاء ميقدرش يحاسبه، ليه؟عشان الواسطة والمحسوبية .. وعشان هو وزير!!! هنحاسب الوزير ونحبسه مثلاً؟! الله؟!!

طب إفرض حد من أعضاء مجلس الشعب اخترق القانون في حاجة معينة .. برده القضاء ملوش سلطة عليه.. ليييه؟!! عشان مجلس الشعب ملوش كبير (مع إن القضاء له حق الرقابة عليه) ..  بس عندنا الوضع بيختلف..

كدة بقى هتحقق عدالة؟!! كل واحد هياخد حقه؟!!

إزاي ممكن يتحقق استقلال القضاء ..

1.     بإن القاضي ميكونش تحت أي تهديد من أي جهة في الدولة .. وإنه يصدر القوانين إل شايفها عادلة على أياً كان الشخص إل قدامه .. هل ده بيتنفذ عندنا في مصر؟!

2.     تاني حاجة إن مفيش أي جهة أو مؤسسة في الدولة تدي قاضي أي أوامر في أي قضية .. أياً كان الشخص وأياً كان الحدث .. القاضي مستقل تماماً وحر تماماً في اتخاذ الحكم العادل حسب القوانين.. تاني: هل ده حاصل في مصر؟!

3.     إن تكون السلطة القضائية هي إل بتدير شؤونها بنفسها، هي إل تعزل أوتعين أوتنقل قضاة .. لكن مش سلطة خارجية هي إل تعمل ده عنها .. عندنا في مصر: وزارة العدل (إل هي أصلاً سلطة تنفيذية) هي إل بتقوم بالتفتيش القضائي.. وبتعين رؤساء المحاكم الإبتدئية .. إفرض وزير العدل اخترق القانون؟ هل هيبقى سهل كدة على القضاة إنهم يصدروا حكم بعقوبة على من يرأسهم، بدون ضغوط داخلية أو خارجية؟!! أكيد لأ .. يبقى القاضي مبيشتغلش ومبيحكمش في جو صحي يحقق العدالة..

القضاة في العهد البائد كانوا بيتعرضوا للتهديد والتدخل في شؤونهم والرشوة (آه للأسف بعضهم) .. عشان كدة العدالة كانت غايبة عندنا .. ولا تصدق أبداً من يتشدقون بأن قضاء مصر نزيه وطول عمره نزيه.. أمال الانتخابات كانت بتتزور إزاي (ده أبسط مثال)، وإزاي كل الوزراء الحرامية إل في السجون دلوقتي مكانش حد بيحاسبهم؟!

(القضاة الشرفاء في العهد البائد فعلاً طالبوا باستقلال القضاء ووقفوا وقفة رجل .. بس اتسجن منهم ناس واتبهدلوا .. )

طيب مش القضاة همّا المسؤولين عن استقلال القضاء؟ إحنا مالنا؟!!

لا مش صحيح .. القضاة خدوا الخطوة الأولى وإحنا لازم ندعمهم ونضغط معاهم عشان نحقق مطلب استقلال القضاء ..

ليه؟! عشان إحنا نص مشاكلنا هتتحل إذا قامت دولة القانون .. إذا رجع القضاء قوي ونزيه "فعلاً" ولا يخضع لأحد .. وأحكامه لا تستثني الجميع .. يبقى إنت ضمنت:

1.     إنك لو دخلت في أي مشكلة مع أي حد في البلد دي .. وإنت ليك الحق، عمرك ما هتتظلم، وهتقبل بالحكم لأنك واثق إنه مش ظلم...

2.     إن لو أي حد (من أكبر راس لأصغر راس) اعتدى عليك بأي شكل .. هيجيلك حق .. وعمره ما هيضيع ..

3.     في الانتخابات (برلمانية أورئاسية) .. إل الشعب فعلاً انتخبه هوّ إل هيفوز، لأن فيه مراقبة صادقة وأمينة للانتخابات .. مش القضاة همّا إل بيراقبوا الانتخابات؟! وهمّا إل مش هيسمحوا بأي تزوير أو لعب..؟ .. قضاء مستقل يعني انتخابات بدون تزوير..

4.     معظم رموز النظام السابق بيتحاكموا دلوقتي .. لو القضاء مش نزيه ومش مستقل .. تفتكر هتصدر أحكام عادلة على الأشخاص دول؟!! تفتكر في ظل قضاء منتهكة حرمته وكل من هب ودب بيتدخل في الأحكام إل بتصدر  .. هتصدر أحكام تجيب حق شهدائنا؟

لأن هيبة القضاء لازم ترجع .. ولأن العدل أساس الملك .. ولأن دولة القانون هي إل بتجيب للمواطن حقه .. ولأن القضاء لازم يكون نزيه .. لازم القضاء المصري يكون مستقل .. وعشان القضاء يكون مستقل .. لازم إحنا الشعب نقف مع قضاة مصر الشرفاء ونطالب معاهم باستقلال القضاء .. عشاننا قبل ما يكون عشانهم .. عشان تضمن حقك دايماً وعشان تضمن إن صوتك هيوصل ..

دمتم أحراراً..