شُهدائنـا .. لماذا لم يتم تشييع جنازة تليق بمكانتهم؟

تصوير: @AhmedFatah

النهاردة كان تشييع جثمان 19 بطل من أبطال مصر ..

  19حُر من أحرارها..

 19شهيد ضحوا بحياتهم فِدا مصــر ..  .. فِدا حريـة مصر ..

فـدا حريتك وحريتي .. 

فدا كرامتك وكرامتي ..

استشهدوا عشان أنا وإنت وكل مصري نعيش بحرية وبكرامة .. ونبني بلدنا إل همّا كانوا بيحلموا بيها

بس همّا اشمعنى دول دوناً عن الشهداء الباقيين إل اتعملهم جنازة علنية؟؟ .. 

عشان دول قعدوا 4 شهور في المشرحة محدش من أهلهم اتعرف عليهم ..

!!!طيب على كدة بقى إتعملتلهم جنازة عسكرية؟ تليق بمكانتهم؟

لأ، الجنازة إل اتعملتلهم اتعرف عنها قبل بساعة .. والأعداد بالتالي كانت قليلة جداً .. ومنهم كتير من أهالي المنطقة..

ده حتى العربيات إل المفروض تنقلهم .. مكنش فيه ..

طب ده يرضي مين؟

طيب هوّ مين إل أمر بدفنهم؟!! د.عصام شرف .. 

وليه مبلغوش الناس قبلها؟؟ الله أعلم..

طيب همّا خدوا كل الإجراءات الكافية وعملوا كل ما بوسعهم وهمّا بيدوروا على أهالي الشهداء ولا قالوا إل عايز ابنه هيجي يدوّر عليه؟؟

 طب ليه مبلغوش الناس؟؟ .. ليه ما تعملتلهمش جنازة تليق بتضحيتهم؟؟

طب ليه على الأقل مخلّوش الجنازة تبقى يوم الجمعة؟

طب ليه أب ولّا أم يفضلوا متأملين إن ابنهم عايش ويستنوه .. وهوّ مش هيجي .. 

هوّ مش الناس إل ضحت عشان مصر تستاهل تتكرم برده؟

اليوم النهاردة كئيب .. لأن شهدائنا اتدفنوا من غير حتى ما أهلهم يودعوهم .. ومن غير ما يصلي عليهم عدد كبير من الناس ..

اتدفنوا ومخدوش حقهم من التكريم .. اتدفنوا وحقهم لسه مرجعلهمش .. 

الحرية والكرامة والعدالة الاجتماعية والتغيير .ووو إل شهدائنا ماتو عشانها .. همّا إل يستاهلوها مش إحنا 

وإحنا ولا عارفيين نجيبها ليهم ولا لنفسنا ..

لحد دلوقتي مفيش حد من إل قتل شهدائنا اتحاسب ..

حق شهدائنا مرجعش .. وإذا معرفناش نجيبه .. نبقى ناس متستحقش حاجة ولا حتى الحياة

متفرطوش في حق شهدائنا .. لولاهم مكنش أي حاجة اتغيرت..

رحم الله شهدائنا .. 

 

http://www.youtube.com/watch?v=v9Iojd7kRtQ&feature=share

http://www.youtube.com/watch?v=GnZy6MZOZUc&feature=youtu.be