قانون تجريم الاعتصامات .. وإيــه يعنـي؟؟

قانون تجريم الاعتصامات والإضرابات العمالية..

جه إزاي القانون ده؟!!!  بدايةً الناس قعدت تعترض على الإضرابات والاعتصامات العمالية، وإن العمال مينفعش يعتصموا ودي اعتصامات فئوية وإن حال البلد وقف وبلا بلا بلا ...

وبعدين فجأة ...!! صدر قرار بتجريم الإضرابات والاعتصامات العمالية .. وفجأة تاني..!!! اتصدق على القانون ده وبقينا ملزمين به وبالامتثال له (بس محدش بيمتثل ليه فعلاً)...

مين العمال دول أصلاً؟؟

العمال دول .. المزارعين، والأطباء والمعلمين والمهنيين والحرفيين والكهربائيين والنجاريين والصياديين وإل بيشتغلوا في البنزينات ومصانع البترول ومصانع النسيج ومصانع الخشب والألمونيوم ووو...

دول كل مصر .. دول الأغلبية في مصر .. إل من غيرهم مش هيكون فيه مصر أصلاً..

طيب.. همّا العمال دول بيعتصموا وبيضربوا عن العمل ليه؟؟

بيعتصموا لمّا مصانعهم تتقفل .. ولما يشوفوا إن رجال الأعمال والأجانب إل ماسكيين المصانع مش مقدريين قيمتها .. بيعتصموا لأنهم بيقعدوا بالشهور ميخدوش مرتبات .. وإذا خدوا تفتكروا بيكون كام؟!!! 70 جنيه .. وأقل أكيد .. وفي نفس الوقت بيشوفوا أصحاب المصانع دي بأجدد العربيات وفي أحسن حالة وهمّا مش لاقيين حتى قوت يومهم .. بيعتصموا عشان عايزين يتعاملوا بكرامة ..

بيعتصموا عشان الثورة في الأساس قامت عشانهم وبسبب إضراباتهم المستمرة خلال السنوات الماضية كلها .. بس همّا متغيرتش أي حاجة في حياتهم ووضعهم..

لكل إل بيقول حال البلد هيقف ومينفعش .. طب همّا مين يشوف حالهم وأوضاعهم عاملة إزاي .. ومين يشوف احتياجاتهم إيه؟؟

أنا باشوف إن العمال دول همّا إل لازم يكونوا أصحاب أعلى مرتبات في البلد،، ليه؟!! عشان همّا إل شايليين البلد .. ومن غيرهم البلد فعلاً هتقف وهيتدهور حالها .. ومش هتبقى بلد أصلاً..

-.-.-.-.-

همّا العمال بس إل بيِضْرِبوا؟!!

هوّ إحنا ليه مركزيين قوي مع العمال وإضراباتهم وناسيين أو إن الشرطة أصلاً مضربة عن العمل برده .. ولا عشان العمال غلابة فا نيجي عليهم؟؟

هيّ مش الشرطة غايبة بقالها فوق إل 4 شهوربرده؟؟ .. بس عارفيين إيه الفرق؟ إن الشرطة بياخدوا مرتباتهم وبتجيلهم لحد عندهم وطلعت لهم زيادات كمان .. وبيتطبطب عليهم عشان يشتغلوا ..

بس العمال .. يشتغلوا مهما كان .. إيه يعني ميقبضوش وإيه يعني ميلاقوش ياكلوا؟؟ المهم يشتغلوا .. البلد هتنهااار .. مش كدة؟؟

طب إزاي؟ بني آدم مش لاقي ياكل وحالته الصحية والنفسية في الحضيض .. إزاي عايزه يشتغل ويديك أحسن ما عنده كمان؟؟ إزاي يكون حاسس بالإهانة من كل الناس ويشتغل عادي كدة؟؟ إزاي يكون شايف إن كل الناس بتهاجمه عشان بيطالب بأبسط حقوقه ويبقى عادي برده؟؟

إنت لو قعدت يومين متاكلش غير عيش –عيش نضيف- هتعرف تشتغل؟؟ ولا هتفضل راقد في السرس ومش قادر تتحرك؟؟

مابالك بشخص بيشتغل في مصنع بالساعاات .. في الحر أو في البرد .. ومطلوب منه يموّت نفسه .. المهم يطلع الشغل سليم..

مش معقول نكون واخدين منهم كل حقوقهم .. وكماان مستكترين عليهم أبسط حاجة إنهم يطالبوا بيها بكل سلمية واحترام..

نقطة تانية بقى .. 

هوّ مش إحنا عملنا ثورة وكان أسبابها الأساسية: عيش، حرية، كرامة، عدالة اجتماعية، ديمقراطية..

فين الحرية والديمقراطية دول؟؟ لمّا يتعمل قانون بتجريم الإضرابات والاعتصامات .. يبقى ده إيه؟؟ حرية مش كدة؟؟

والقانون صدر من غير ما يتعرض على الشعب كمان .. دي ديمقراطية بقى .. مش كدة؟؟

والقانون اتفعّل .. وفي بعض العمال والطلاب اتقبض عليهم .. وعشان يطلعوا بكفالة كان لازم يدفعوا عشرة آلاف جنيه.. بس بعد كدة سقطت الكفالة عنهم ..

إحنا مش هنقبل إننا نرجع تاني بأي شكل من الأشكال للعهد البائـد ..

ومش هنقبل إن حد يسلب مننا حقوقنا تاني ..

اتحدوا مع عمال مصـر يا شعب مصـر .. وخليكم في صفّهم مش ضدهم..

تاني .. من غيرهم .. البلد متمشيش ..

دمتم أحراراً..